ខេត្តកំពង់ឆ្នាំង៖ គិតមកបច្ចុប្បន្ន ខេត្តកំពង់ឆ្នាំង បានទទួលអំណោយដ៏ថ្លៃថ្លាជាសាលារៀនពីសម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រិទ្ធបណ្ឌិត ប៊ុន រានី ហ៊ុនសែន ជិត ២០០ខ្នង ស្មើជាង ១០០០បន្ទប់ ដែលសាងសង់ស្ទើរគ្រប់កន្លែង រហូតដល់ទីជនបទ។ វត្តមានសាលារៀនរបស់សម្តេចតេជោ និងសម្តេចកិត្តិព្រឹទ្ធបណ្ឌិតទាំងនេះ បានធ្វើឱ្យវិស័យអប់រំទូទាំងខេត្តកំពង់ឆ្នាំង និយាយដោយឡែក និងនិយាយជារួម បានកើនឡើងកម្រិតខ្ពស់ ព្រោះអត្រាបោះបង់សាលា បានកាត់បន្ថយ។
ក្នុងកិច្ចសម្ភាសន៍ដល់អ្នកសារព័ត៌មាន កាលពីព្រឹកថ្ងៃទី១៦ ខែធ្នូ ឆ្នាំ២០២០ លោក សឹម ប្រឹម ប្រធានមន្ទីរអប់រំយុវជន និងកីឡា ខេត្តកំពង់ឆ្នាំង បានបញ្ជាក់ថា គិតមកដល់បច្ចុប្បន្ន ខេត្តកំពង់ឆ្នាំង បានទទួលអំណោយជាសាលារៀនពីសម្តេចតេជោ ហ៊ុនសែន និងសម្តេចកិត្តិព្រិទ្ធបណ្ឌិត ប៊ុន រានី ហ៊ុនសែន បានចំនួន ១៧៣ខ្នង ស្មើនឹង ១ ១៣៤បន្ទប់ ដោយគិតទាំងសាលាគរុកោសល្យ វិទ្យាល័យ អនុវិទ្យាល័យ សាលាបឋម និងមតេយ្យសិក្សា។ នេះមិនទាន់គិតទីលានកីឡា ការជីកស្រះទឹក និងការចាក់ដីបំពេញតាមសាលារៀននិមួយៗទៀតផង។
លោក សឹម ប្រឹម បានបញ្ជាក់ទៀតថា ការសាងសង់សាលារៀនគ្រប់ទីកន្លែង តាំងពីក្នុងក្រុង រហូតដល់ទីជនបទ ដែលជាសេវាអប់រំនេះ គឺមានសារៈប្រយោជន៍ធំធេងណាស់ ដោយបានធ្វើឱ្យអត្រាបោះបង់សាលារៀន អវត្តមានរបស់សិស្ស និងអត្រាគ្រោះថ្នាក់ចរាចរណ៍ ត្រូវបានកាត់បន្ថយ និងប្តូរត្រឡប់មកវិញ គឺគុណភាពអប់រំ បានកើនឡើងកម្រិតខ្ពស់ ដែលបានធ្វើឱ្យអត្រាកំណើនសិស្សឡើងថ្នាក់បានកើនឡើង ជារៀងរាល់ឆ្នាំ។
ដោយហេតុនេះហើយ ក្នុងនាមលោក ជាប្រធានមន្ទីរអប់រំ ជួសមុខឱ្យបុគ្គលិកសិក្សា លោកគ្រូអ្នកគ្រូ មាតាបិតា និងអាណាព្យាបាលសិស្ស សូមថ្លែងអំណរគុណយ៉ាងជ្រាលជ្រៅចំពោះសម្តេចតេជោ ហ៊ុន សែន និងសម្តេចកិត្តិព្រិទ្ធបណ្ឌិត ប៊ុន រានី ហ៊ុនសែន និងសូមប្រសិទ្ធិពរជ័យ ជូនសម្តេចទាំងទ្វេ សូមសម្តេចមានជន្មាយុយ៉ឺនយូរ សុខភាពបរិបូរណ៍ កម្លាំងមាំមួន ដើម្បីដឹកនាំប្រទេសជាតិ ឱ្យកាន់តែរីកចំរើន រុងរឿងជាបន្តទៀត។
ទោះជាយ៉ាងណា តាមការបញ្ជាក់ពីប្រធានមន្ទីរអប់រំយុវជន និងកីឡា ខេត្តកំពង់ឆ្នាំង បច្ចុប្បន្ន ក្នុងខេត្តកំពង់ឆ្នាំង ក៏នៅមានខ្វះសាលារៀនខ្លះដែរ ដោយសារចំនួនសិស្សកើនឡើង និងដោយសារអាគារសិក្សាចាស់ ខ្លះមានសភាពទ្រុតទ្រោម និងខ្លះទៀត ចាស់ខ្លាំងពេក មិនអាចឱ្យសិស្សចូលរៀនបាន។ ហេតុនេះហើយ លោកក៏សូមអំពាវនាវបន្ថែមដល់សប្បុរសជននានា មេត្តាជួយសង់សាលារៀនបន្ថែមដល់ខេត្តកំពង់ឆ្នាំង ដើម្បីឱ្យខេត្តមួយនេះ មានសាលាគ្រប់គ្រាន់ សម្រាប់ឆ្នាំសិក្សាខាងមុខទៀត៕ ពៅ សុខហ៊ាន
